१
ट्रेन्डिङ
महेन्द्रनगर– भेटेरिनरी अस्पताल तथा पशु सेवा विज्ञ केन्द्र कञ्चनपुर उत्कृष्ठ विज्ञ केन्द्रको रुपमा सम्मानित भएको छ । भुमि व्यवस्था कृषि तथा सहकारी मन्त्रालयले आर्थिक वर्ष २०८१।८२ मा संचालन गरेका कार्यक्रमहरुको वार्षिक प्रगति समिक्षा गोष्ठीको समापन समारोहमा सुदूरपश्चिम प्रदेशभरीका भेटेरिनरी तथा पशु विज्ञ केन्द्रमध्ये भेटेरिनरी तथा पशु विज्ञ केन्द्र कञ्चनपुर उत्कृष्ठ विज्ञ केन्द्रको रुपमा प्रशंसा पत्र सहित सम्मानित भएको हो । आर्थिक वर्षभित्र संचालन गरेका कामहरुको मुल्याङ्कनको प्रस्तुतिकरणको आधारमा पशु विज्ञ केन्द्र कञ्चनपुर उत्कृष्ट भएको हो ।
त्यसैगरी आर्थिक वर्षभित्र संचालन गरेका कामहरुको मुल्याङ्कनको प्रस्तुतिकरणलाई आधार मानेर कृषि ज्ञानकेन्द्रहरु मध्ये कृषि ज्ञान केन्द्र डोटी उत्कृष्ठ भएको छ । कृषि ज्ञान केन्द्र कञ्चनपुरको कार्यप्रगति अरु कार्यालयकोभन्दा न्यून देखिएको छ । त्यसैगरी एक जना अग्रणी कृषकरुपमा तरकारी जर्मप्लाज्म डडेल्धुराका कृषकलाई सम्मान गरिएको छ ।
धनगढीमा आईतबारदेखि मंगलबारसम्म संचालन भएको उक्त गोष्ठीमा सुदुरपश्चिम प्रदेशमा रहेका कृषिसंग सम्बद्ध सबै कार्यालयहरुले आ–आफ्नो काम र सोको प्रगति प्रस्तुत गरेका थिए । प्राप्त उपलब्धि कार्यक्रम संचालनमा देखा परेका समस्याहरु र प्रगति हुन नसकेका विषयहरुमा समिक्षा गरिएको छ । मन्त्रालयको कार्य संचालन गर्न निर्माण भएका केही कार्यविधिहरु संशोधन र नयाँ निर्माण गर्न आवश्यक रहेका कार्यविधि र मापदण्ड सम्बन्धमा समेत गोष्ठीमा छलफल भएको छ ।
