बैंकको लिलाममा किर्ते र मिलेमतो खुलासा : विक परिवारको घरजग्गा हडपिएको आरोप

कञ्चनपुर
शुक्लाफाँटा नगरपालिका–१० मा बैंकको लिलाम प्रक्रियामा गम्भीर अनियमितता र किर्ते भएको तथ्य सार्वजनिक भएको छ। बैंकले लिलाम सकार गरेपछि घर–बाटो सिफारिससमेत किर्ते गरी लिएको पाइएको हो।
बैंकका कर्मचारी दिपक भट्ट स्वयं वडा कार्यालयमा उपस्थित भई विक परिवार महेन्द्रनगरमा भएकाले आउन नसक्ने बहाना बनाउँदै वडाबाट घर–बाटो सिफारिस लिएको खुलासा भएको छ। वडा अध्यक्ष लाल बहादुर ऐर ले बैंक कर्मचारी भट्टले कार्यालयलाई झुक्याएर ज्ञानु विश्वकर्माको किर्ते दस्तखत प्रयोग गरी सिफारिस लिएको पुष्टि गर्ने पत्रसमेत दिएका छन्।
विक परिवारले न्यायको खोजी थालेपछि बैंकले लिलाम प्रक्रियामा संलग्न कर्मचारीहरू हेरफेर गरेको आरोपसमेत लगाइएको छ। प्रदेश कार्यालयका छविराज जोशी र झलारी शाखाका तत्कालीन प्रमुखलाई अन्यत्र सरुवा गरिएको थियो। विक परिवारले बैंकको महेन्द्रनगर शाखाका प्रमुखसहितको मिलेमतोमा आफ्नो घर लिलाम गरिएको दाबी गर्दै उक्त कार्यमा संलग्न सबैलाई कारबाहीको माग गरेका छन्।
पीडित विकले भने,
“यो जानाजान गरिएको योजनाबद्ध कार्य हो। हाम्रो घरजग्गा हडपिएको छ, हामी न्याय चाहन्छौं।”
यता, एनएमबि बैंकको झलारीस्थित शाखाका ऋण शाखा कर्मचारीले भने सबै कागजात केन्द्रीय कार्यालयमा पठाइसकेको र शाखामा कुनै रेकर्ड नरहेको बताएका छन्। झलारी शाखाका ऋण विभागमा कार्यरत अमर विष्ट ले विकको लोन फाइल केन्द्रीय कार्यालयमै पठाएकाले शाखामा कुनै विवरण उपलब्ध नभएको जानकारी दिए।
घटनाले बैंकिङ प्रणालीभित्रको पारदर्शिता र उत्तरदायित्वमाथि गम्भीर प्रश्न उठाएको छ भने पीडित परिवार न्यायको प्रतीक्षामा छन्।