सक्षम परियोजनाबाट कृष्णपुरका १ हजार ५८४ घरधुरी लाभान्वित

कञ्चनपुर, पुष १३
कञ्चनपुरको कृष्णपुर नगरपालिकामा विगत चार वर्षदेखि सञ्चालनमा रहेको सक्षम परियोजना मार्फत १ हजार ५८४ घरधुरीका किसान प्रत्यक्ष रूपमा लाभान्वित भएका छन्। लिबर्ड संस्थाले सन् २०२२ देखि २०२५ सम्म सञ्चालन गरेको यस परियोजनाले ग्रामीण भेगका साना तथा विपन्न किसानको जीवनस्तरमा उल्लेखनीय सुधार ल्याएको पाइएको छ।
कृष्णपुर नगरपालिका–१, २, ४, ५ र ९ नम्बर वडामा सञ्चालन भएको परियोजनाबाट महिला, दलित, मुक्त कमैया, अपाङ्गता भएका व्यक्ति तथा आदिवासी जनजाति समुदाय प्रत्यक्ष लाभान्वित भएका छन्। लिबर्डका कार्यक्रम अधिकृत नविन पौडेलद्वारा प्रस्तुत प्रतिवेदन अनुसार परियोजनामा १ हजार २६५ महिला र ३११ पुरुष सहभागी थिए भने १ हजार २२७ मुक्त कमैया, १६५ दलित, ६५ अपाङ्गता भएका व्यक्ति र १०८ बिटिसी समूहका सदस्य सहभागी रहेका थिए।
प्रतिवेदनअनुसार परियोजनाले किसानको खाद्य तथा पोषण अवस्था सुधार, आयआर्जन वृद्धि, जलवायु परिवर्तन अनुकूलन र विपद् जोखिम व्यवस्थापन क्षमता विकासमा उल्लेखनीय योगदान पुर्‍याएको छ। साना किसान, भूमिहीन, मुक्त कमैया, हलिया, दलित, थारु तथा बाढी प्रभावित किसानलाई लक्षित गरी विभिन्न कार्यक्रम सञ्चालन गरिएको अधिकृत पौडेलले बताए।
परियोजनाअन्तर्गत किसानलाई तालिम, जलवायु अनुकूलन सामग्री वितरण, घर–विद्यालय बगैँचा निर्माण, गोठ सुधार, पशुपालन, पशु बीमा, उद्यमशील विकास तालिम, जैविक तटबन्ध निर्माण, बहुउद्देश्यीय नर्सरी, सौर्य ऊर्जा जडान तथा कृषि मेला सञ्चालन गरिएको थियो। यी प्रयासपछि किसानहरू निर्वाहमुखी कृषिबाट व्यवसायिक कृषितर्फ उन्मुख भएको पौडेलले बताए।
परियोजनाका सामाजिक परीक्षक धिरेन्द्र सिनालले किसानमा ज्ञान, सीप र प्रविधिको पहुँच बढेकाले जीवनशैलीमै सुधार आएको बताए। “पहिले चाडपर्व कुर्ने किसान अहिले नियमित रूपमा पोषिलो खाना उपभोग गर्न थालेका छन्,” उनले भने। साथै उनले बाली बीमा कार्यक्रमलाई थप प्रभावकारी रूपमा लागू गर्न सुझाव दिएका छन्।
परियोजना संयोजक ईन्देश्वर मण्डलले जलवायु अनुकूलन कार्यक्रममार्फत किसानलाई आत्मनिर्भर बनाउने लक्ष्यसहित घर तथा विद्यालयमा रैथाने बाली, तरकारी र फलफूल खेती प्रवर्द्धन गरिएको बताए। उनले सिकाइ र उपकरणको स्वामित्व अब स्थानीय सरकारले ग्रहण गर्नुपर्नेमा जोड दिए।
कृष्णपुर नगरपालिका उपप्रमुख द्रोपती रानाले सक्षम परियोजनापछि नगरका किसान आत्मनिर्भरतातर्फ उन्मुख भएको बताउँदै प्राप्त उपलब्धिलाई आगामी वर्षको नीति तथा कार्यक्रममा समेट्ने प्रतिबद्धता जनाइन्। उनले किसानमुखी कार्यक्रमलाई अझ विस्तार गर्न आग्रहसमेत गरिन्।
आइतबार आयोजित सामाजिक परीक्षण तथा परियोजना हस्तान्तरण कार्यक्रममा परियोजनामा संलग्न कर्मचारी र संस्थालाई प्रमाणपत्र तथा दोसल्ला ओढाएर सम्मान गरिएको थियो। कार्यक्रमको सञ्चालन कृष्णपुर नगरपालिकाका सूचना अधिकारी प्रेमबहादुर बोगटीले गरेका थिए भने जनप्रतिनिधि, किसान र सरोकारवाला निकायको उल्लेखनीय सहभागिता रहेको थियो।