१
ट्रेन्डिङ
कञ्चनपुर ।
सानै उमेरदेखि व्यापार–व्यवसायमा आबद्ध हुँदै आएका बेदकोट नगरपालिका–९ सुन्दरपुरका प्रदिप पाल हाल संघको कोषाध्यक्ष पदका लागि चुनावी मैदानमा उत्रिएका छन्। उनी संघको १७औँ कार्य समिति निर्वाचनबाट सदस्य निर्वाचित भइसकेका व्यक्ति हुन्।
२०७४ सालमा संघको सदस्यता लिएका पाल प्रदिप ट्रेडर्सका सञ्चालक समेत हुन्। कार्य समिति सदस्यको जिम्मेवारी सफलतापूर्वक निर्वाह गरेपछि उनले अब संघको आर्थिक नेतृत्व सम्हाल्ने लक्ष्यसहित कोषाध्यक्ष पदमा उम्मेदवारी दिएका छन्।
पालको व्यवसायिक यात्रा बाल्यकालमै सुरु भएको हो। उनका बुवा मान सिंह पालको तत्कालीन रौतेली बिचवा गाविसको अण्डैया पटैयामा चिया तथा किराना पसल थियो। पालको जन्म पनि सोही स्थानमा भएको हो।
“बुवाको चिया र किराना पसल गाउँमै थियो, म त्यहीँबाट व्यवसायमा जोडिएको हुँ। १० वर्षको उमेरमै चिया बेच्न थालेको थिएँ,” पाल भन्छन्।
शुक्लाफाँटा राष्ट्रिय निकुञ्ज (तत्कालीन शुक्लाफाँटा वन्यजन्तु आरक्ष) विस्तारका क्रममा पाल परिवार विस्थापित भएर बेदकोट पुगेको थियो। विस्थापनपछि पनि परिवारले अझैसम्म जग्गा सट्टाभर्ना नपाएको पाल बताउँछन्। आफू आरक्ष पीडित भएको उनको भनाइ छ।
विस्थापन हुनुअघि नै अध्ययनका लागि महेन्द्रनगर आएका पालले कक्षा ६ देखि भीमदत्त नगरपालिका–१२ स्थित पूर्णा माध्यमिक विद्यालयमा अध्ययन गरेका थिए।
व्यवसायसँगै पाल विभिन्न सामाजिक संघ–संस्थामा समेत सक्रिय छन्। उनले नेपाली उत्पादनलाई भारतसम्म बजारीकरण गर्न महत्वपूर्ण योगदान पुर्याएका छन्। विशेषगरी डोटीको बीपी नगरपालिकामा उत्पादन हुने अदुवालाई भारतीय बजारसम्म पुर्याएर बजारीकरण गरेको उदाहरण उनले प्रस्तुत गरेका छन्।
“नेपाली उत्पादनलाई अन्तर्राष्ट्रिय बजारसम्म पुर्याउन सके देशको आर्थिक समृद्धि सम्भव छ,” पालको विश्वास छ।
सानैदेखि संघर्ष, विस्थापनको पीडा र निरन्तर मेहनतबाट अघि बढेका पाल अहिले संघको आर्थिक नेतृत्व सम्हाल्ने लक्ष्यसहित अघि बढेका छन्। उनका अनुभव र व्यवसायिक दृष्टिकोणले संघलाई अझ सशक्त बनाउने अपेक्षा गरिएको छ।
