१
ट्रेन्डिङ
कंचनपुर
बेदकोट नगरपालिकामा महिलाको आयआर्जन र आत्मनिर्भरता अभिवृद्धि गर्ने उद्देश्यसहित सञ्चालन गरिएको डल कुसुम तालिम सफलतापूर्वक सम्पन्न भएको छ। बेदकोट नगरपालिकाका १० वडाबाट सहभागी २२ जना महिलालाई लक्षित गरी उक्त तालिम आयोजना गरिएको हो। 
तालिम समापन कार्यक्रममा बोल्दै बेदकोट नगरपालिकाका नगरप्रमुख तथा कार्यक्रमका सभाध्यक्ष भोजराज बोहराले महिलाहरूलाई आत्मनिर्भर बनाउने उद्देश्यले कार्यक्रम सञ्चालन गरिएको बताउनुभयो। छोटो समयको तालिम भए पनि सहभागीहरूले राम्रोसँग सिप सिकेको र सिकेका सीपलाई व्यवहारमा उतार्दै बजारसम्म बिक्री गर्न सक्ने क्षमताको विकास भएको उहाँको भनाइ थियो। महिलाहरू आत्मनिर्भर हुँदा समाजमा सम्मान र इज्जत बढ्ने उल्लेख गर्दै उहाँले आत्मनिर्भर महिलाले आफ्नो घरव्यवहार आफैँ चलाउन सक्ने बताउनुभयो। साथै, आगामी दिनमा थप तालिमको व्यवस्था गरिने पनि जानकारी दिनुभयो।
यसैगरी बेदकोट नगरपालिकाका उपप्रमुख तुलसी जोशीले महिलाहरू पनि आत्मनिर्भर भएर अघि बढ्नुपर्ने बताउनुभयो। छोटो अवधिमै सहभागीहरूले उत्कृष्ट रूपमा सिप सिकेको र तयार गरेका डलहरू अत्यन्त आकर्षक रहेको उहाँको भनाइ थियो। सिकेको सिपलाई व्यवहारमा उतार्न उहाँले सहभागीहरूलाई प्रेरणा दिनुभयो।
गरिबी निवारणका लागि उद्धमशीलता विकास गर्ने उद्देश्यले कार्यक्रम सञ्चालन गरिएको भन्दै उद्धर लघु उद्यम विकास कार्यक्रमका शाखा प्रमुख अमर महराले छोटो समयमा धेरै कुरा सिक्न कठिन भए पनि सिकेको सिपलाई व्यवहारमा उतार्न र आगामी चरणमा एडभान्स तालिममार्फत महिलाहरूलाई थप सशक्त बनाइने बताउनुभयो।
कार्यक्रमका प्रशिक्षक अञ्चली चन्दका अनुसार तालिमको अवधि छोटो भएकाले सबै कुरा सिकाउन कठिन भए पनि सहभागीहरूले उत्साहका साथ धेरै कुरा सिक्न सफल भएका छन्। यस्ता तालिम कम्तीमा एक महिनासम्म सञ्चालन भए अझ प्रभावकारी हुने उहाँको भनाइ थियो।
कार्यक्रमको सञ्चालन बेदकोट नगरपालिकाका सहजकर्ता कुशम भट्टले गर्नुभएको थियो। सहभागी महिलाहरूले पनि तालिम उपयोगी रहेको बताउँदै समय छोटो भए पनि धेरै कुरा सिक्न पाएको र आगामी दिनमा यस्ता कार्यक्रमको अवधि बढाउनुपर्ने सुझाव दिएका छन्।
उक्त तालिमले महिलाहरूलाई सिप, आत्मविश्वास र आत्मनिर्भरताको दिशामा अघि बढ्न महत्वपूर्ण भूमिका खेलेको सहभागीहरूको भनाइ छ।
