१
ट्रेन्डिङ
महेन्द्रनगर, फागुन ३० — अध्ययन र रोजगारीको खोजीमा अष्ट्रेलिया पुगेका धनगढीका १९ वर्षीय निशान देव सिड्नीमा भएको भीषण दुर्घटनामा परेका छन्। गम्भीर घाइते भएका उनी अहिले जीवन र मरणको दोसाँधमा संघर्ष गरिरहेका छन्।
चार महिना अघि अध्ययनका लागि धनगढीबाट अष्ट्रेलियाको सिड्नी पुगेका निशान फेब्रुअरी १३ मा म्यास्कटस्थित एक क्याटरिङ कम्पनीमा किचन ह्यान्डको रूपमा काम गरिरहेका बेला दुर्घटनामा परेका हुन्। सामान ओसार्ने लिफ्ट बिग्रिएपछि इमर्जेन्सी बटन थिचेर सामान निकाल्ने प्रयास गर्दा करिब २५०० केजीभन्दा बढी तौलको लिफ्ट उनीमाथि खसेको थियो।
दुर्घटनाको क्षण सम्झिँदै निशानले भने, “करिब २५०० केजी तौलको लिफ्ट मेरो शरीरमाथि खस्यो। मेरो आधा शरीर लिफ्टभित्र र आधा बाहिर भयो। म बीचमै नराम्ररी थिचिएँ। लिफ्ट तलतल पेल्दा मेरा एङ्कलहरू पाँच–छ पटक घुमे र टुक्रा–टुक्रा भए।”
चिकित्सकका अनुसार दुर्घटनामा उनका १४ वटा करङ भाँचिएका छन् भने फोक्सोमा समेत प्वाल परेको छ। साथै दुवै खुट्टा र एङ्कल गम्भीर रूपमा क्षतिग्रस्त भएका छन्।
करिब एक महिना लामो अस्पताल उपचारपछि उनी सिड्नीस्थित सानो कोठामा फर्किएका छन्। तर अवस्था अझै नाजुक रहेको बताइएको छ। कोठामा हेरचाह गर्ने कोही नभएकाले दैनिक सामान्य कामकाज गर्नसमेत उनलाई कठिन भइरहेको छ।
निशान करिब ३५ लाख रुपैयाँ ऋण गरेर अष्ट्रेलिया पुगेका थिए। दुर्घटनापछि उनका अध्ययन कार्य पूर्ण रूपमा ठप्प भएको छ र उनले आफ्नो पढाइ ‘डिफर’ गर्न बाध्य भएका छन्। आमालाई अष्ट्रेलिया ल्याएर हेरचाह गराउन चाहेपनि आर्थिक अभावका कारण त्यो सम्भव हुन सकेको छैन।
यसैबीच, उनको उपचार र सहयोगका लागि एनआरएनए न्यु साउथ वेल्सको पहलमा आर्थिक सहयोग संकलन अभियान सुरु गरिएको छ। इच्छुक व्यक्तिहरूले सहयोग गर्न सक्ने बताइएको छ।
