गृहमन्त्री सुधन गुरुङको राजीनामा: ‘पदभन्दा ठूलो नैतिकता’ भन्दै विवादबीच पद त्याग

काठमाडौं — गृहमन्त्री सुधन गुरुङले बुधबार आफ्नो पदबाट राजीनामा दिएका छन्। विवादित व्यवसायीसँग सेयर कारोबार गरेको आरोप लागेपछि उनले प्रधानमन्त्री बालेन्द्र शाहलाई भेटेर औपचारिक रूपमा राजीनामा बुझाएका हुन्।
राजीनामापछि सामाजिक सञ्जाल फेसबुकमार्फत सार्वजनिक धारणा राख्दै गुरुङले जनविश्वासभन्दा ठूलो शक्ति अरू केही नभएको उल्लेख गरेका छन्। उनले “रामराज्यको चाहना राख्नेहरूले त्याग र नैतिक साहस पनि देखाउन सक्नुपर्छ” भन्दै सार्वजनिक जीवनमा स्वच्छता र नेतृत्वमा उत्तरदायित्व आवश्यक रहेको बताएका छन्।
उनले पछिल्लो समय उठिरहेको ‘जेनजी आन्दोलन’ ले पनि सुशासन, पारदर्शिता र जवाफदेहिताको मागगरिरहेको सन्दर्भ जोड्दै आफूले पदमा रहँदा कुनै ‘कन्फ्लिक्ट अफ इन्ट्रेस्ट’ नहोस् भन्ने उद्देश्यले राजीनामा दिएको स्पष्ट पारे।
“मसँग सम्बन्धित विषयमा निष्पक्ष छानबिन होस् भन्ने चाहनाका साथ आजकै मितिदेखि लागू हुने गरी मैले गृह मन्त्री पदबाट राजीनामा दिएको छु,” उनले वक्तव्यमा भनेका छन्।
गुरुङले सरकार निर्माणमा सहिद भएका ४६ जना युवाको बलिदानप्रति सम्मान व्यक्त गर्दै उनीहरूको त्यागमाथि प्रश्न उठेमा त्यसको जवाफ नैतिकता नै हुने बताएका छन्।