कञ्चनपुर वैशाख ३०
बैतडी, सुदूरपश्चिम — बैतडी जिल्लाको धार्मिक, सांस्कृतिक तथा ऐतिहासिक पहिचान बोकेको पञ्चदेवल शिवधाम तथ
सप्तदेवल क्षेत्रलाई नमुना पुस्तकालय–संग्रहालय र धार्मिक पर्यटन केन्द्रका रूपमा विकास गर्ने अभियान तीव्र रूपमा अघि बढिरहेको छ।
धार्मिक आस्था, पुरातात्त्विक सम्पदा र सांस्कृतिक गौरवको अद्वितीय संगम मानिने यो क्षेत्र अहिले राष्ट्रिय महत्वको परियोजनाका रूपमा परिचित बन्दै गएको छ।
परियोजनाअन्तर्गत करिब ४०० वटा पिपल रुख, १००८ सहस्रलिङ्ग संरचना तथा ७०० शिवकुण्ड न्वलो निर्माण तथा संरक्षणका कार्य समेटिएका छन्। यी संरचनाले धार्मिक वातावरणलाई थप पवित्र बनाउनुका साथै पर्यटकीय आकर्षण पनि उल्लेखनीय रूपमा बढाएका छन्।
यस सम्पदाको ऐतिहासिक महत्वलाई पुष्टि गर्दै वि.सं. २०६४ सालमा पुरातत्व विभाग, रामशाहपथ काठमाडौं मा औपचारिक रूपमा दर्ता गरिएको उल्लेख गरिएको छ। साथै, परियोजनासम्बन्धी हुलाक टिकट प्रकाशन हुनुका साथै दशरथ चन्द नगरपालिकाको लोगो समेत प्रयोग गरिएको छ, जसले यसको संस्थागत पहिचानलाई थप मजबुत बनाएको छ।
हाल भवन निर्माण कार्य सम्पन्न भइसकेको छ भने रङरोगन, फर्निचर व्यवस्थापन, कार्पेट तथा र्याक जडान, शौचालयको अन्तिम व्यवस्थापन र विद्युत जडानलगायतका केही कार्यहरू सम्पन्न हुन बाँकी रहेका छन्। बाँकी कार्य पूरा भएपछि यो क्षेत्र अझ व्यवस्थित, आकर्षक र सुविधासम्पन्न धार्मिक–पर्यटकीय गन्तव्य बन्ने अपेक्षा गरिएको छ।
स्थानीयवासी तथा सरोकारवालाहरूका अनुसार पञ्चदेवल शिवधाम सप्तदेवल क्षेत्रले भविष्यमा बैतडी जिल्लाको धार्मिक तथा पर्यटन प्रवर्द्धनमा महत्वपूर्ण भूमिका खेल्नेछ। यस परियोजनाले स्थानीय स्तरमा रोजगारी सिर्जना, आन्तरिक तथा बाह्य पर्यटन वृद्धि र सांस्कृतिक पहिचान संरक्षणमा दीर्घकालीन योगदान पुर्याउने विश्वास गरिएको छ।
धार्मिक आस्था, ऐतिहासिक महत्व र सांस्कृतिक सम्पदाको अनुपम धरोहरका रूपमा रहेको यो क्षेत्र भविष्यमा नेपालकै महत्वपूर्ण धार्मिक तथा सांस्कृतिक गन्तव्य बन्ने सम्भावना बोकेको बताइएको छ।
सहयोगका लागि अपील
मन्दिर, पुस्तकालय तथा संग्रहालयको थप विकास तथा व्यवस्थापन कार्यमा सहयोग गर्न इच्छुक व्यक्ति, समाजसेवी तथा संघ–संस्थाहरूलाई सहयोगका लागि अनुरोध गरिएको छ।
📞 सम्पर्क नं.: ९८६३६८०६६०