धर्मा रोकाया
कञ्चनपुर भदौ २५ गते
जिल्ला ट्राफिक कार्यालय कञ्चनपुरको आयोजनामा नागरिकका गुनासा, सुझाव तथा अपेक्षालाई प्रत्यक्ष रूपमा सम्बोधन गर्ने उद्देश्यसहित नागरिक सुनुवाई कार्यक्रम प्रभावकारी रूपमा सम्पन्न भएको छ।
कार्यक्रममार्फत ट्राफिक व्यवस्थापन, सडक सुरक्षा, दुर्घटना न्यूनीकरण तथा नागरिकमैत्री सेवा प्रवाहका विषयमा सरोकारवालाबीच महत्वपूर्ण छलफल तथा अन्तरक्रिया गरिएको थियो।
कार्यक्रममा सहभागी नागरिक तथा सरोकारवालाहरूले जिल्लाको ट्राफिक व्यवस्थापनसँग सम्बन्धित विभिन्न समस्या, चुनौती तथा सुधारका विषयमा आफ्ना धारणा, जिज्ञासा, गुनासा र रचनात्मक सुझावहरू प्रस्तुत गरेका थिए। सहभागीहरूबाट प्राप्त सुझावलाई ट्राफिक व्यवस्थापनलाई अझ व्यवस्थित, सुरक्षित, पारदर्शी तथा जनउत्तरदायी बनाउन महत्वपूर्ण आधारका रूपमा लिइएको जिल्ला ट्राफिक कार्यालय कञ्चनपुरका प्रमुख बालेन्द्र नाथले बताउनुभएको छ।
कार्यक्रमले प्रहरी र नागरिकबीचको सम्बन्धलाई थप सुदृढ गर्दै आपसी विश्वास, सहकार्य र समन्वय अभिवृद्धि गर्न महत्वपूर्ण योगदान पुर्याएको कार्यक्रममा सहभागी हरूले बताएका छन्। नागरिकका आवाजलाई प्राथमिकतामा राख्दै आगामी दिनमा ट्राफिक सेवा प्रवाहलाई अझ प्रभावकारी, सहज र नागरिकमैत्री बनाउँदै लैजाने प्रतिबद्धतासमेत कञ्चनपुर ट्राफिक प्रमुख बालेन्द्र नाथले व्यक्त गर्नुभएको थियो।
समग्रमा, नागरिकका समस्या र अपेक्षालाई प्रत्यक्ष रूपमा सुन्ने तथा समाधानका लागि सहकार्यको वातावरण निर्माण गर्ने उद्देश्यले आयोजित उक्त नागरिक सुनुवाई कार्यक्रम सार्थक, उपलब्धिमूलक तथा प्रभावकारी रूपमा सम्पन्न भएको छ।