१
ट्रेन्डिङ
महेन्द्रनगर–भारतीय सीमावर्ती सहर उद्यम सिंह नगरमा बर्ड फ्लु संक्रमण देखिएपछि सीमा क्षेत्रमा सतर्कता अपनाउन थालिएको छ । भेटेरिनरी अस्पताल तथा पशु सेवा विज्ञ केन्द्र कञ्चनपुरले भारतीय सीमावर्ती क्षेत्रबाट कुखुृरा तथा कुखुराजन्य पदार्थ पैठारीमा सचेतना अपनाउन आग्रह गरेको हो ।
केन्द्रका प्रमुख पशु चिकित्सक निर्देशक श्याम सिह खड्काले भारतको उद्यम सिह नगरमा बर्ड फ्लु पुष्टि भएको समाचार आएपछि सीमा क्षेत्रमा उच्च सतर्कता अपनाएको बताए । ‘केही दिन अघि भारतको उद्यमसिम नगर र बागेश्वरमा बर्ड फ्लु पुष्टि भएको समाचार अमर उजाला दैनिकमा आएको छ, यो समाचारलाई आधार बनाएर अहिले सीमावर्ती क्षेत्र र कुखुरा किसानलाई सतर्कताका लागि आग्रह गरि रहेका छौ’ उनले भने ।
उद्यमसिह नगर सीमावर्ती क्षेत्र भएकाले सतर्कता अपनाउन नसकिए बर्ड फ्लु संक्रकण भित्रिन सक्ने भन्दै किसानहरुलाई सतर्कता अपनाउन आग्रह गरेका छन् । ‘सीमा क्षेत्र नजिक छ, त्यसैले यो अति नै संवेदशिल छ, जुनसुकै बेला पनि आउन सक्छ,’ उनले भने ‘त्यसैले सबैले संवेदनशिल बन्न आवश्यक छ, सबै कुखुरा किसानहरुले सतर्कता हुन जरुरी छ ।’
कार्यालय प्रमुख खड्काका अनुसार संक्रमित कुखुरा, कुखुराले खाना खाना, खुवाउने भाँडाकुँडा, बसाइसराई गर्ने चराचुरुङ्गीबाट बर्ड फ्लु आउन सक्ने उच्च जोखिम हुन्छ । बसाई सराई गर्ने चराचुरुङ्गीबाट समेत आएर ठूलो क्षति हुन सक्ने भएकाले समयमा सचेतना अपनाएर मात्रै न्यूनीकरण गर्न सकिने उनले बताए ।
कार्यालयले सीमावर्ती क्षेत्रबाट कुखुरा सहित कुखुराजन्य पदार्थ लगायतका सबै ओसारपासरमा नियन्त्रणका लागि सबैलाई आग्रह गरेको उनले बताए । ‘त्यसका लागि हामीले जनचेतना फैलाउने कार्य गरि रहेका छौ’ कार्यालय प्रमुख खड्काले भने । कञ्चनपुरको ब्रह्मदेबदेखि डोकेबजार सम्म भारतसित खुला सीमा छ ।
