बेलौरी मेयर कपमा खेलाडीमाथि कुटपिट — कञ्चनपुर खेलकुद समितिको छानबिन र कडा कारबाहीको माग

कञ्चनपुर — बेलौरीमा जारी मेयर कप फुटबल प्रतियोगिताका क्रममा खेलाडी करन पालमाथि भएको कुटपिट घटनापछि खेलकुद क्षेत्रबाट दोषीमाथि कडा कारबाही र निष्पक्ष छानबिनको माग तीव्र बनेको छ।
आइतबार मायामेट्रो अस्पतालमा उपचाररत पाललाई भेट्न पुगेका कञ्चनपुर खेलकुद समितिका अध्यक्ष कुबेर खड्काले घटनाप्रति गम्भीर चिन्ता व्यक्त गर्दै “दोषीलाई कुनै हालतमा उन्मुक्ति दिनु हुँदैन” भन्दै तत्काल छानबिन प्रक्रिया अघि बढाउन सम्बन्धित निकायलाई आग्रह गरे।
उनका अनुसार खेल मैदानमै भएको हिंसात्मक आक्रमण एक खेलाडीमात्र नभई सम्पूर्ण खेल क्षेत्रमाथिको प्रहार भएको हो।
घटनापछि प्रदेश खेलकुद परिषद्को सदस्य–सचिव, कञ्चनपुर जिल्ला फुटबल संघ, जिल्ला खेलकुद समिति, जिल्ला रेफ्री संघ तथा स्थानीय खेलकुद समुदायले पनि एक स्वरमा दोषी पहिचान गरी कानुनी कारबाही गर्न माग गरेका छन्।
अध्यक्ष खड्काले घाइते खेलाडीको उपचारमा आवश्यक सहयोग सुनिश्चित गर्नुका साथै भविष्यमा यस्ता अमानवीय घटना दोहोरिन नदिन खेलमैदानमा सुरक्षा व्यवस्था कडाइका साथ लागू गर्नुपर्ने आवश्यकता औँल्याए।
यसैबीच, पालका परिवार, स्थानीय खेलाडी तथा खेलकुद क्षेत्रका अगुवाहरूले कानुनी प्रक्रियामा ढिलाइ वा सम्झौताको प्रयास भए आन्दोलनमा उत्रिन बाध्य हुने चेतावनी दिएका छन्।
सुदूरपश्चिमबाट बी–डिभिजन लिगसम्म खेलिसकेका प्रतिभाशाली खेलाडी पालमाथि खेलमैदानमै भएको कुटपिटप्रति प्रदेशभर तीव्र प्रतिक्रिया आएको छ। केही समय अघि बेलडाँडीको झिलमिला युवा समाजले उनलाई विशेष सम्मान प्रदान गरेको थियो।
चर्चित खेलाडी यति गम्भीर रूपमा घाइते हुनु खेदजनक भएको भन्दै आयोजक समितिमाथि चर्को आलोचना बढ्दै गएको छ। सुरक्षा व्यवस्थामा कमजोरी र विवाद व्यवस्थापनमा उदासिनता देखिएको भन्दै यसको पूरा जिम्मेवारी आयोजक समितिलाई लिनुपर्ने माग उठिरहेको छ।