१
ट्रेन्डिङ
कञ्चनपुर । नेपाल प्रिमियर लिग (एनपीएल) को दोस्रो संस्करणको उपाधि लुम्बिनी लायन्सले हात पारेको छ। त्रिवि क्रिकेट मैदानमा सम्पन्न फाइनलमा सुदूरपश्चिम रोयल्सलाई ६ विकेटले पराजित गर्दै लुम्बिनीले शानदार प्रदर्शनसहित च्याम्पियन बन्ने उपलब्धि हासिल गरेको छ।
टस जितेर ब्याटिङ गरेको सुदूरपश्चिम रोयल्स १९.१ ओभरमै ८५ रनमा अलआउट भएपछि यस संस्करणको एनपीएलमा पहिलो इनिङ्समा बनेको सबैभन्दा कम स्कोरको चुनौती दिएको थियो । फाइनलजस्तो महत्वपूर्ण खेलमा कमजोर ब्याटिङ देखिँदा सुदूरपश्चिम लगातार दोस्रो पटक उपविजेतामा सीमित रहन बाध्य भयो।
८६ रनको सामान्य लक्ष्य पछ्याएको लुम्बिनी लायन्सले ९ ओभरमै ४ विकेट गुमाउँदै लक्ष्य पूरा गर्यो। ओपनर दिनेश अधिकारीले १३ बलमा १ चौका र ५ छक्का प्रहार गर्दै आक्रामक सुरुवात दिलाए। डार्सी सर्ट १४ रनमा आउट भए भने रोहित कुमार पौडेल १६ रनमा क्याच भए। सन्दीप जोरा डकआउट भए पनि निरोशन डिकवेला १६ रन र दिलिप नाथ १ रनमा अविजित रहँदै टोलीलाई उपाधि दिलाए।
सुदूरपश्चिमका लागि बलिङतर्फ हेमन्त धामीले २ विकेट लिए भने अभिनास बोहोरा र दीपेन्द्र सिंह ऐरीले १–१ विकेट हात पारे।
यसअघि सुदूरपश्चिमको ब्याटिङमा इशान पाण्डेले सर्वाधिक ३३ रन बनाए। विनोद भण्डारी र पुनित मेहरा डकआउट हुँदा अन्य ब्याटरहरू पनि टिक्न सकेनन्। कप्तान दीपेन्द्र सिंह ऐरी १३ रनमा आउट भए। लुम्बिनीका कप्तान रोहित पौडेलले १०.५ र १०.६ ओभरमा लगातार दुई विकेट लिँदै व्यक्तिगत ह्याट्रिक पूरा गरे, जुन एनपीएल इतिहासको दोस्रो ह्याट्रिक हो।
लुम्बिनी लायन्सका लागि बलिङमा रोहित पौडेल, रुबेन ट्रम्पलमेन र शेर मल्लले समान ३–३ विकेट लिए भने तिलक राज भण्डारीले १ विकेट थपे।
लिग चरणदेखि उत्कृष्ट प्रदर्शन गर्दै फाइनल पुगेको सुदूरपश्चिम निर्णायक खेलमा अपेक्षित प्रदर्शन गर्न असफल रह्यो। पहिलो सिजनमा अंक तालिकाको अन्तिम स्थानमा रहेको लुम्बिनी लायन्सले यसपटक नतिजा उल्ट्याउँदै एनपीएल–२ को उपाधि जितेर इतिहास रचेको छ।
