१
ट्रेन्डिङ
कञ्चनपुर
महेन्द्रनगर भिमदत्तनगरपालिका वडा नम्बर १० मा करिब ३ करोड रुपैयाँको लगानीमा महत्वपूर्ण सडक निर्माण हुने भएको छ। दोधारा–चाँदनी, भीमदत्त हुँदै ब्रह्मदेव लिङ्क जोड्ने सडक निर्माणको ठेक्का ज्ञान÷जिके जेभी महेन्द्रनगरले पाएको छ।
गड्डाचौकी ब्यारियलदेखि करिब डेढ किलोमिटर लम्बाइको यस सडक बजार क्षेत्रभित्र नालीसहित सात मिटर फराकिलो निर्माण गरिनेछ। सडक निर्माणसँगै व्यवस्थित नाली बनाइने भएकाले वर्षा तथा बाढीको समयमा हुने पानी निकास समस्यामा समेत सुधार आउने अपेक्षा गरिएको छ।
भीमदत्त नगरपालिका वडा नम्बर १० का वडा अध्यक्ष महेश चन्दले ३ करोडको लगानीमा निर्माण हुन लागेको यस सडकले मुख्य बजार, विद्यालय, स्वास्थ्य चौकी तथा आवासीय क्षेत्रलाई जोड्ने बताए। उनले यसले स्थानीय यातायात सहज बनाउनुका साथै जनजीवनमा सकारात्मक परिवर्तन ल्याउने विश्वास व्यक्त गरे।
अध्यक्ष चन्दले भने, “फराकिलो सडक र नाली निर्माणले हाम्रो शहरको दिगो विकास र सुरक्षित यातायाततर्फ ठूलो कदम हुनेछ। हामी स्थानीय बासिन्दा र यात्रुहरूको सुविधा तथा सुरक्षालाई प्राथमिकतामा राखेर काम गरिरहेका छौँ।”
स्थानीय बासिन्दाहरूले पनि सडक निर्माणपछि दैनिक जीवन सहज हुने र बजार क्षेत्रको सौन्दर्यतामा उल्लेखनीय सुधार आउने विश्वास व्यक्त गरेका छन्।
ज्ञान÷जिके जेभी महेन्द्रनगरका सञ्चालक ज्ञानेन्द्र प्रसाद जोशीले चाँदनी–भीमदत्त–ब्रह्मदेव लिङ्क सडकको निर्माण कार्य शुक्रबारदेखि सुरु गरिने जानकारी दिए। उनले सम्झौता भएको समयसीमाभन्दा अगावै निर्माण कार्य सम्पन्न गर्ने प्रतिबद्धता जनाए।
सडक निर्माण सम्पन्न भएपछि यस क्षेत्रको यातायात व्यवस्थापन, पानी निकास र समग्र शहरी विकासमा उल्लेखनीय सुधार आउने अपेक्षा गरिएको छ।
