जिल्लामा अपराध नियन्त्रण तीव्र : ८ मुद्दा दायर, १०५ सचेतनामूलक कार्यक्रम सम्पन्न

जिल्लामा अपराध न्यूनिकरण तथा सामाजिक सुरक्षालाई मजबुत बनाउन प्रहरीले सक्रियता बढाएको छ। प्रहरीका अनुसार हालसम्म विभिन्न प्रकृतिका ८ वटा सम्बन्धित मुद्दा दायर गरिएको छ।
दायर भएका मुद्दामध्ये बहुविवाह १, जबरजस्ती करणी ४, अपहरण तथा शारीरिक बन्धक १, अपहरण तथा शरीर बन्धक तथा जजक १ र विद्युतीय कसुर तथा साइबर अपराध १ रहेको प्रहरीले जनाएको छ। प्रहरी तथ्यांकअनुसार पीडितभन्दा पीडकको संख्या बढी देखिएको छ। महिला, बालबालिका तथा ज्येष्ठ नागरिकसँग सम्बन्धित २९ मुद्दा विश्लेषण गर्दा पीडक ३० जना र पीडित २९ जना रहेका छन्।
यसैबीच प्रहरीले अवैध गतिविधि नियन्त्रणलाई पनि कडाइ गरेको छ। १ सय लिटर अवैध मदिरा नियन्त्रणमा लिएर नष्ट गरिएको छ भने प्राकृतिक सम्पत्ति दोहन रोक्न ३ वटा ट्रयाक्टर नियन्त्रणमा लिई रु. ८,९२० जरिवाना असुल गरिएको छ।
सामुदायिक तथा विद्यालयस्तरमा सचेतना अभिवृद्धि गर्ने उद्देश्यले प्रहरीले उल्लेखनीय कार्यक्रमहरू सञ्चालन गरेको छ। शीर्षकगत रूपमा आयोजना गरिएका १०५ सचेतनामूलक कार्यक्रममा ६,०३५ जना सहभागी भएका थिए। त्यस्तै, ४३ वटा विद्यालयमा सञ्चालन गरिएको विद्यालय सचेतनामूलक कार्यक्रममा कक्षा ६ देखि स्नातक तहसम्मका ३,००६ जना विद्यार्थी सहभागी भएका छन्।
प्रहरीका अनुसार जनसम्पर्क र सूचनाको पहुँच बढाउन हटलाइन सेवा पनि प्रभावकारी बनेको छ। जिल्ला प्रहरी कार्यालयको हटलाइन नम्बर १०० मा १,८७६ कल प्राप्त भएका छन् भने डिसीमा ५ सय कल आएका थिए।
प्रहरीले आगामी दिनमा पनि अपराध नियन्त्रण, सचेतना विस्तार र समुदाय–प्रहरी सहकार्यलाई अझ सशक्त बनाउँदै लैजाने प्रतिबद्धता जनाएको छ।