कञ्चनपुर:
कञ्चनपुरको दोधाराचाँदनी नगरपालिका–१ स्थित चाँदनी गैरीशंकर सामुदायिक वन क्षेत्र नजिकै जगबुढा नदीको हिलो र पानीमा फसेको बाघको बच्चाको समयमै उद्धार नहुँदा मृत्यु भएको छ।
स्थानीयका अनुसार बुधबार बिहान बाघको बच्चा बघिनी आमासँगै उक्त क्षेत्रमा देखिएपछि प्रहरी, वन र शुक्लाफाँटा राष्ट्रिय निकुञ्जलाई खबर गरिएको थियो। निकुञ्जको टोली उद्धारका लागि पुगे पनि बघिनीले गाउँमा आतंक मच्चाउन सक्ने भन्दै बच्चालाई त्यहीँ छाडेर फर्किएको आरोप लागेको छ। बिहान जिउँदै देखिएको बाघको बच्चा साँझ मृत अवस्थामा फेला परेको थियो।
उनले भने, “उद्धार टोली बिहानै गएको थियो, तर उद्धार नगरी फर्कियो। यस्तो चिसो मौसममा हिलो र पानीमा फसेको बच्चालाई किन छाडियो भन्ने प्रश्न उठ्छ।” उनका अनुसार उद्धार गरेर बघिनी गएको दिशातर्फ जंगलमै छाड्न सकिन्थ्यो।
डिसीले यस विषयमा वन मन्त्रालय र संरक्षण फोरममा कुरा उठाउने चेतावनीसमेत दिएका छन्। “उद्धारमा जाने टिएडिए खाने तर वन्यजन्तु मर्न दिने काम राम्रो होइन,” उनले भने।
तर, शुक्लाफाँटा राष्ट्रिय निकुञ्जका प्रमुख संरक्षण अधिकृत चन्द्रशेखर चौधरीले बाघको बच्चाको मृत्यु संयोगवश भएको दाबी गरेका छन्। उनका अनुसार अवस्था जटिल भएकाले तत्काल उद्धार गर्न कठिनाइ भएको थियो।
