कंचनपुर
सुदूरपश्चिम प्रदेशबाट राष्ट्रिय सभा सदस्यमा नेकपा एमालेकी लीला कुमारी भण्डारी र नेपाली कांग्रेसका खम्मबहादुर खाती निर्वाचित भएका छन्।
प्रदेश निर्वाचन कार्यालय धनगढीका प्रमुख प्रेमराज भट्टका अनुसार महिला तर्फ ३ हजार ९८४ मत प्राप्त गर्दै भण्डारी विजयी भएकी हुन्। उनकी निकटतम प्रतिद्वन्द्वी नेपाली कम्युनिष्ट पार्टी (नेकपा) की रोजी बस्नेतले १ हजार ६ सय ७६ मत प्राप्त गरिन्।
यसैगरी, अन्य समूह तर्फ नेपाली कांग्रेसका खम्मबहादुर खाती ३ हजार ९ सय ६९ मत प्राप्त गर्दै विजयी भए। उनका प्रतिद्वन्द्वी नेकपाका टिकाराम जैशीले १ हजार ८०५ मत प्राप्त गरेका थिए।
निर्वाचनमा प्रदेश सभा सदस्य बराबर ५३ र पालिकाका प्रमुख, उपप्रमुख, अध्यक्ष तथा उपाध्यक्ष बराबर १९ मतभार तोकिएको थियो। ४९ जना प्रदेश सभा सदस्य र १७१ जना पालिकाका प्रमुख, उपप्रमुख, अध्यक्ष तथा उपाध्यक्ष गरी कुल २२० जनाले मतदान गरेका थिए। जम्मा मतदाता संख्या २२४ रहेकोमा ४ मत खसेन।
मतदान नगर्नेहरूमा नेपाली कांग्रेसका प्रदेश सभा सदस्य प्रकाश देउवा, राप्रपाका प्रदेश सभा सदस्य खेमा विष्ट, धनगढी उपमहानगरपालिकाका प्रमुख गोपाल हमाल र जोशिपुर गाउँपालिकाकी उपाध्यक्ष रेखा कठरियालगायत रहेका छन्।
महिला तर्फ एक जना र अन्य तर्फ एक जना गरी दुई सदस्यका लागि भएको निर्वाचनमा चार जना उम्मेदवारबीच प्रतिस्पर्धा भएको थियो। निर्वाचनमा नेपाली कांग्रेस र नेकपा एमालेबीच गठबन्धन रहेको थियो।
